Institucionet shtetërore janë angazhuar për lehtësimin e situatës së krijuar në pikën e kalimit kufitar me Greqinë, në Kakavijë. Rreth 200 efektivë të Forcave të Armatosura u kanë shërbyer gjatë gjithë natës dhe orëve të para të së shtunës qytetarëve që ndodhen të bllokuar atje.
Ata kanë shpërndarë dhe vazhdojnë të furnizojnë qytetarët me ujë, ushqime dhe të ndihmojnë për higjienën sanitare në terren. Në këtë emergjencë civile janë përfshirë Forcat e Armatosura dhe strukturat bashkiake të Gjirokastrës, Këlcyrës, Dropullit, Tepelenës e Përmetit.
Po ashtu Drejtori I Agjencisë Kombëtare të Mbrojtjes Civile, Haki Çako ndodhet në Kakavijë për të monitoruar nga afër situatën e krijuar. Ndërsa qeveria shqiptare ëhstë në komunikim të vazhdueshëm me palën greke për lehtësimin e procedurave, të cilat janë procedura të njëjta në çdo pikë hyrëse të Greqisë, për qytetarët e çdo vendi, përfshirë edhe qytetarët grekë që hyjnë në një kufi.
