Një specialist i Zyrës së Kadastrës në Sarandë përfundoi në pranga pas denoncimit të tij në media se merrte ryshfet kundrejt legalizimit të objekteve.
Në pranga përfundoi Laert Pasha, i cili i kërkoi 4 mijë euro një qytetari për nxjerrjen e dokumentit të Hipotekës mbi pronësinë e një hoteli.
“Specialistët e Hetimit të Krimit në Komisariatin e Policisë Sarandë, pas transmetimit në emisionin investigativ ‘Stop’, të denoncimit të një rasti korruptiv në ASHK Sarandë, bënë ndalimin me iniciativë të shtetasit L. P., 41 vjeç, banues në Sarandë, me detyrë specialist i sportelit dhe arkivës në zyrat e ASHK-së Sarandë.
Ky shtetas dyshohet se ka konsumuar elementë të veprës penale “Korrupsioni pasiv i personave që ushtrojnë funksione publike”, sqaroi Policia.
Përgjimet
Pronari i një hoteli në Sarandë prej tri vitesh sorollatet nëpër institucione për të marrë dokumentin e pronësisë, ndërkohë që Laert Pasha, dikush ish-drejtor i Agjencisë së Legalizimit, i kishte premtuar se do ta pajiste me dokumentin e pronësisë kundrejt ryshfetit, duke i kërkuar 4 mijë euro për nxjerrjen e hipotekës.
“Unë isha me atë djalin e xhaxhait mbrëmë dhe e di, si është muhabeti,- tha, ktu o vlla, tha, ktu kanë paguar nga 5000 euro,- tha për një shpi normale. Tani më fal,- tha, se ti je në Angli tha, ke dhe gjithë atë objekt 4 kate, do shpëtosh ti, se pagova unë 2 mijë euro,- më tha. Legalizimi do, ashtu.., do të hidhesh,- tha.
Ç’rëndësi ka tani? Unë kam 2 milionë lekë dhe 2 mijë euro. Kam edhe 300 paund. Të jemi prapë bashkë. Këtu është muhabeti. Dakord! Kaq kam në dispozicion. 2 milionë lekë dhe 2 mijë euro. Fol me Sajmirin, të flas me shefen! Lëri njërën, lëri tjetrën! Unë të marr ato të miat nga e hëna, nga e marta, dhe t’iki në punën time. Kaq gjë! Kaq gjë, o vlla! Do flasësh vetë me atë që t’.. ashtu edhe më kthe një përgjigje!”, thotë qytetari gjatë bisedës me Pashën.
Ky i fundit, i ankohet se prona është e mbivendosur. Pas takimit, ai i premton qytetarit se do të flasë me hartografin Saimir Braho, duke i kërkuar 100 euro kapar.
“Epo prandaj, se kshu më tha dhe mua. Tani sot, dje më fal, që aty ngela dhe unë kshu, se foli me shefen dhe s’kisha ça thosha, se ishin bashkë të dy ata, ka mbivendosje. Ç’është kjo mbivendosje,- thashë. Eh, ka dalë aty,- më tha. Më tha në fillim i kam te shefja”, thotë ai sipas publikimit në emisionin “Stop”.
Qytetari, i cili prej më shumë se 25 vjetësh jeton në Angli, denoncon korrupsionin në Kadastrën Sarandë, i cili kalon në disa rrjete sekserësh, zyrtarë dhe jo të tillë. Për legalizimin e hotelit fillimisht në 2018 nëpërmjet një sekseri Jorgo Kreku i morri 2000 Euro ku e lidhi asokohe me drejtorin e Legalizimeve, Laert Pasha, i cili i premtoi që do i nxirrte legalizimin e hotelit, por nuk e bëri duke e zvarritur për 3 vite.
“Si fillim më kërkoi 16 mijë Euro ryshfet. Lamë pazarin përfundimisht tek gjysma, tek 8 mijë Euro. Pagova 2 mijë Euro si paradhënie. Ia dhashë Jorgos se më tha që do marrin të tërë me radhë ata që do të bëjnë punën dhe pjesën tjetër kur të mbarojnë legalizimet. Duke nxjerrë justifikime se Aluizni u bashkua me Kadastrën dhe e kam pyetur çfarë është bërë me dokumentet e mia, gjithmonë më nxirrte nga një sebep më thoshte që kur të bashkohen Hipoteka me Aluiznin bashkë. Në 2019 ndodhi që ra dhe tërmeti dhe ishin pasojat e tërmetit. Hapte ca historia pa lidhje fare dhe nuk ma bënë legalizimin”, tha denoncuesi.
