Policia e Sarandës ka arrestuar dy persona të cilët prej 4 vitesh ishin vënë nën hetim me metoda speciale të hetimit për shpërndarje kokaine në Sarandë.
Julian Guga, 45 vjeç, me precedentë penalë për “vjedhje me dhunë”, “vjedhje me armë”, “marrëdhënie seksuale me të mitur mbetur në tentativë” dhe Aleks Mema, 51 vjeç, me precedentë për “dhënie ndihmë për kalim të paligjshëm të kufirit” dhe “trafik i lëndëve narkotike”, të dy banues në Sarandë, janë arrestuar pas urdhër arrestit të lëshuar nga Prokuroria e Sarandës.
Gjykata e Sarandës ka vendosur ndaj tyre masën e sigurisë “Arrest në burg” për veprën penale “prodhim dhe shitje të lëndëve narkotike”, vendim i cili është ekzekutuar nga policia e Sarandës.
NJOFTIMI I POLICISE
Ishin në hetim prej gati 4 vitesh, për prodhim dhe shitje në narkotikëve, kapen dhe vihen në pranga 2 shtetas.
Shërbimet e Komisariatit të Policisë Sarandë, në vijim të punës për kapjen e shtetasve që qarkullojnë me sende të kundërligjshme dhe atyre të shpallur në kërkim, bazuar dhe në informacionet e siguruara nga inteligjenca informative, kanë lokalizuar dhe kapur shtetasit në kërkim: J. G., 45 vjeç dhe A. M., 51 vjeç, të dy banues në Sarandë. Gjykata e Sarandës ka caktuar për secilin nga këta shtetas, masën e sigurisë “Arrest në burg”, në kuadër të një procedimi penal të regjistruar në vitin 2019, për veprën penale “Prodhimi dhe shitja e narkotikëve”. Materialet i kaluan Prokurorisë, për veprime të mëtejshme procedurale.
