Trajneri i Luftëtarit, Hasan Lika, është treguar i sinqert pas ndeshjes me Partizanin, duke theksuar se nuk e priste që skuadra e tij të fitonte kaq thellë. Ai u shpreh se ishte dita me fat e skuadrës së tij dhe fati i keq i Partizanit.
“Fitorja më e bukur e karrierës? Jo, nuk mund ta quaj kështu. Na gëzon fitorja, por them se është e ekzagjeruar. Sot i kemi shfrytëzuar në maksimum rastet për shënim dhe nga ana tjetër nuk kemi marrë gol.
Skuadra gjithmonë krijon raste në fakt, por sot ishte fati ynë i mirë dhe fati i keq i Partizanit. Në një farë mënyre, u treguam më të kujdesshëm, e gjetëm në befasi kundërshtarin me lojtarët tanë të sulmit.
Me Kamzën kemi bërë ndeshje të mirë, por edhe sot. Duhet të jemi të ndërgjegjshëm pse arriëm të fitojmë, pa kaluar në efurori. Nuk mund të fitojmë sërish me këtë rezultat, por duhet të marrim sa më shumë pikë.
Partizani dobët? Kemi një skuadër që nuk mund të fitojmë 5-0, aq më tepër me Partizanin. Gaboi më shumë se duhet mbrojtja kundërshtare. Ne raste krijojmë gjithmonë, por nuk e prisnim të fitonim kaq thellë.
Jam pjesë e Luftëtarit tani, por pas ndeshjes gjithmonë pyes për Partizanin. Kam ardhur me dëshirë te Luftëtari, pasi kam parë që kjo skuadër luan futboll të mirë dhe mund të bëjë shumë mirë. ka lojtarë që sot janë më të mirët në vend”, – ka thënë pas ndeshjes për “Supersport” trajneri i Luftëtarit, Hasan Lika.
