Socialistët në Gjirokastër kanë mbledhur sot Asamblenë e partisë nën drejtimin e drejtuesit politik për qarkun, Bledi Çuçi. Krahas diskutimit për pjesën organizative të fushatës elektorale dhe zgjedhjeve, është komunikuar edhe vendimi i Kryesisë së PS-së, për komandimin e kryetarit të ri në Gjirokastër. Ai është Gentian Llogo, aktualisht drejtor i Ndërmarrjes së Ujësjellës-Kanalizimeve. Llogo ka qenë edhe më herët për një periudhë të shkurtër kohe kryetar i Partisë Socialiste në Gjirokastër.
Ai do të qëndrojë në këtë post deri në përfundim të zgjedhjeve parlamentare të 25 prillit. Më pas PS do të vendosë me votë emrin e kryetarit të ri të degës lokale. Në mbledhje krahas Çuçit ishin edhe deputetët Mirela Kumbaro e Artemis Malo. PS synon në qarkun Gjirokastër të ruajë rezultatin e vitit 2017 kur mori tre mandate edhe pse ne rang qarku 3 nga 7 bashki drejtoheshin prej opozitës.
Mbetet për t’u parë si do të shkojnë gjërat, por e sigurt është që kjo ka për të qenë fushata mbase më e ashpër e këtyre 30 viteve pluralizëm politik. Nuk diskutohet vetëm mandati i tretë i Edi Ramës, por edhe fati politik i Lulzim Bashës dhe Partisë Demokratike.
©argjiroja.net
