Numri “2” i “Operacionit Forca e Ligjit”, Artan Shkëmbi ka përdorur një program të koduar për dërgimin e mesazheve lidhur me një hetim për trafik droge të nisur nga Gjermania të shtrirë dhe në Shqipëri. Shkëmbi rezulton se ka përdorur programin me pagesë “EncroChat” për të nxjerrë të dhëna për rastin në fjalë. Ky aplikacion është një sistem me pagesë që lejon shkëmbimin e mesazheve të kriptuara që lexohen vetëm nga dhënësi e marrësi.
Vendimi i pezullimit nga detyra për Shkëmbin u mor të dielën nga gjyqtarja e gatshme Etleva Deda pas kërkesës së bërë nga SPAK. Mësohet informacionet në lidhje me Shkëmbin kanë ardhur nga partneret gjermanë. Sipas të njëjtave burime, kanë qenë këto shërbime që gjatë transkriptimit të bisedave të personave të përfshirë ne aktivitet kriminal në shtetin gjerman, kanë zbuluar dhe komunikimin e numrit dy të OFL-së. Ai pritet të dalë të mërkurën (nesër) para gjykatës.
Rrjeti EncroChat është përdorur gjerësisht vitin e fundit nga rrjetet kriminale aq sa u bë shqetësim për policitë e disa vendeve të BE duke i detyruar agjentët të infiltrohen ne rrjet mes marsit dhe qershorit 2020 gjatë një hetimi në të gjithë Evropën. Ky rrjet kishte rreth 60,000 abonentë në kohën e mbylljes së tij. Të paktën 800 arrestime janë bërë në të gjithë Evropën që nga 7 korriku 2020.
