Presidenti i Shteteve të Bashkuara të Amerikës, Donald Trump sërish ka folur për marrëveshjen mes Kosovës dhe Serbisë të nënshkruar me 4 shtator në Shtëpinë e Bardhë. Në një tubim që ka mbajtur në Nebraska, teksa ishte duke folur për nominimin për çmimin Nobel Trump është shprehur edhe për ndërmjetësimin e SHBA-së për dialogun Kosovë-Serbi. Trump tha se ka ndalur luftën 400 vjeçare mes të dyja vendeve duke theksuar se dy muaj më parë të dy palët ajo kosovare dhe ajo serbe ishin në zyrën e tij duke puthur e përqafuar njëri tjetrin.
“Unë jam nominuar për tri çmime Nobel, a mund ta besoni? Mes Kosovës dhe Serbisë, bëmë një marrëveshje për normalizimin ekonomik. Ata kanë qenë duke luftuar dhe duke vrarë njëri-tjetrin për shumë dekada. U thashë se nuk do të bënim asnjë biznes me ta nëse nuk ndalonin së luftuari. Dhe e dini çfarë? U deshën vetëm 20 minuta për të firmosur marrëveshjen. Mendoj që po luftoheshin që prej 400 vjetësh, ishin duke luftuar për shumë kohë”, tha Trump.
