E bujshme nga Spanja, Interi i bën ofertë Messit

Leo Mesi nuk ka ndërmend që të rinovojë kontratën me Barcelonën dhe skuadrat e interesuara janë duke ndjekur me vëmendje zhvillimet rreth tij. Nga Spanja raportojnë disa lajme që bëjnë me krahë tifozët e Interit. Gazetari i njohur spanjoll, Eduardo Inda bën me dije se “Suning” ka lëvizur për të transferuar Leo Mesin dhe ka bërë një ofertë shumë të rëndësishme në tavolinën e tij. “Rinovimi i Mesit është shumë i komplikuar. Për momentin nuk ka ndërmend që të vazhdojë bashkëpunimin me Barcelonën dhe kam informacione që ka marrë një ofertë shumë të rëndësishme nga Interi. Në fakt ai ka kërkesa nga Interi, por edhe nga gjysma e botës.
Futbolli italian është duke rilindur falë një ligji që ndihmon të huajt dhe i largon nga taksat”, ka thënë Inda në “El Chiringuito Tv”. Pak ditë më parë u raportua se Siti kërkon që të bëjë një parakontratë me kapitenin e Barcelonës në muajin janar, por duket se zikaltrit nuk janë dorëzuar. Tani situata është krejt ndryshe nga ajo në merkaton e verës. Leo do të largohet si futbollist i lirë (me parametra zero) dhe asnjë skuadër nuk duhet të paguajë për kartonin e tij. Duhet thjesht të bëjë ofertën e duhur financiare për të bindur Mesin. Interi është i gatshëm dhe duket se e ka bërë këtë, i ndihmuar nga kompania që e menaxhon “Suning”. Priten zhvillime në muajt e fundit të këtij viti. Barcelona pritet të bëjë zgjedhjet në janar, por deri atëherë Leo Mesi pritet të ketë oferta të shumta.