Vaksina e Universitetit të Oksfordit për Covid-19, mund të bëjë që në Britaninë e Madhe, ajo që quhet imuniteti i tufës të krijohet deri në sezonin e verës.
Sipas shkencëtarit Calum Semple, një ekspert i sëmundjeve të frymëmarrjes dhe anëtar i Grupit Këshillimor Shkencor të Qeverisë për Emergjencat (SAGE), vaksina AstraZeneca e Oxford mund të “ndryshojë lojën” në betejën kundër koronavirusit.
Duke folur për BBC, Prof Semple tha: “Personat që janë vaksinuar do të mbrohen brenda disa javësh dhe kjo është shumë e rëndësishme”.
Sipas profesorit, kjo vaksinë mund të ruhet në temperatura më të përshtatshme se sa ajo e Pfizer-BioNTech, dhe për këtë arsye është më e lehtë të transportohet.
“Kjo vaksinë është shumë e rëndësishme sepse jo vetëm që gjeneron antitrupa që ju mbrojnë nga infektimi, por gjithashtu gjeneron këto ‘qeliza vrasëse gjuetare’ – qelizat T – që në të vërtetë merren me infeksionin”, tha ai për BBC Breakfast.
