Autoritetet greke kanë njoftuar se 427 raste të reja janë testuar sot pozitivë me koronavirus, nga të cilat 9 u zbuluan pas kontrolleve në pikat hyrëse të vendit.
Kështu numri i përgjithshëm i rasteve që nga fillimi i pandemisë llogaritet 140 526, nga të cilat 52.3% janë burra. Gjatë gjurmimit u zbulua se 5478 (3.9%) konsiderohen të lidhura me udhëtimet nga jashtë vendit dhe 42 054 (29.9%) kanë të bëjnë me një rast tashmë të njohur.
407 persona trajtohen me intubim. Mosha e tyre mesatare është 68 vjeç. 268 (65.8%) e të intubuarve janë burra. 82.1% e pacientëve të intubuar kanë një sëmundje themelore ose janë të moshës 70 vjeç e lart.
Fatkeqësisht gjatë 24 orëve të fundit kanë humbur betejën me COVID edhe 54 pacientë, duke e çuar numrin e viktimave në 5 011, nga këto 2 976 (59.4%) burra.
Mosha mesatare e viktimave ishte 79 vjeç dhe 95.5% kishin një sëmundje themelore dhe / ose moshën 70 vjeç e lart.
