“Me 36 autoambulancat e reja moderne, përmbyllet programi i transformimit të flotës sonë të Urgjencës Shëndetësore, nga një inventar karakatinash me 4 rrota në një fuqi të motorizuar e të pajisur me standardet më të mira europiane”.
Kështu u shpreh sot Kryeministri Edi Rama, i cili bashkë me Ministren e Shëndetësisë dhe Mbrojtjes Sociale, Ogerta Manastirliu dhe kreun e Urgjencës Kombëtare, Skënder Brataj, inspektuan flotën me 36 autoambulancat e reja dhe moderne të Urgjencës Shëndetësore.
“Imagjinoni vetëm sikur pandemia ta kishte gjetur Shqipërinë me katërrrotakët e katërshes së sotme opozitare dhe sidomos me LSI në drejtimin e shëndetësisë, se çfarë hataje kombëtare do të kishte qenë”, tha Rama.
Kryeministri tha se “me këtë që kemi tani në raport me nevojën, mund të themi se tani jemi në plotësim të nevojës”.
“U plotësua gjithë ajo lemeri dhe rrënimi i çerekshekulli është mbrapa krahëve tani me gjithë këtë reformë ristrukturim dhe dixhitalizim i të gjithë procesit. Tani mbetet vetëm të mbahet niveli dhe të vazhdohet me intensitet. Momenti kur të kaloj flama e COVID do të jetë më e stabilizuar situata dhe do të rritet akoma më shumë shpejtësia e shërbimit”, tha Rama.
Ndërsa theksoi se ky është një investim i qeverisë shqiptare, Ministrja Manastirliu theksoi se “vetëm në këto dy vite kemi 80 autoambulanca të reja”. “Flota jonë ekzekutive në terren kalon numrin e 150 autoambulancave me kushte optimale”, tha ajo.
Manastirliu tha se “këto autoambulanca do të shkojnë në çdo cep të Shqipërisë, do të shpërndahen në spitalet rajonale”.
“Vite më parë qytetarët transferoheshin me makina personale. Nuk kishte një numër unik urgjence dhe nuk kishte autoambulanca asnjë gjë brenda, ishin bosh dhe luanin rolin e taksive. Tani janë jo vetëm të mirëpajisura por edhe me ekipe të mirëtrajnuara”, tha ajo.
Ministrja theksoi se “këto 36 autoambulanca do t’i dedikohen menaxhimit të pandemisë dhe do të ofrojnë shërbim cilësor për pacientët dhe lehtësi për çfarëdo lloj skenari që mund të paraqitet në raport me COVID”.
Kreu i Urgjencës Kombëtare, Brataj tha se “te këto autoambulanca janë 4400 litra oksigjen, ndërsa janë të pajisura me setin e trajtimit të pjesës kardiake, setin e traumës etj”. “Është një minispital që shkon te pacienti”, tha ai.
Brataj tha se “gjithë ky investim e justifikon më së miri trajtimin e pacientit në banesë”.
Ai theksoi se shpejtësia e arritjes te pacienti nga urgjenca është në një mesatare prej rreth 13.5 minutash. “Bëhet fjalë për urgjenca të arrestit kardiak, traumën, lindjet dhe është e njëjta me Europën dhe botën. Nuk ka asnjë ndryshim si kohë mbërritje tek pacienti”, tha ai.