Kryeministri grek Kyriakos Mitsotakis është akuzuar për shkeljen e kufizimeve COVID-19 për herë të dytë në tre muaj, masa të vendosura nga qeveria e tij. Një video tregonte Kryeministrin që ndiqte një drekë me rreth tridhjetë mysafirë të tjerë në ishullin Ikaria të Egjeut. Mitsotakis u filmua në ballkonin e një shtëpie në pronësi të Christodulos Stefanadis, një mjek dhe ligjvënës lokal për partinë në pushtet Demokracia e Re.
Imazhet e drekës, të cilat u filmuan nga një fqinj në ishullin e largët, nxitën kritika të gjera nga partitë opozitare të Greqisë.
Qeveria e vendit kishte forcuar kufizimet gjatë pandemisë së koronavirusit, duke përfshirë një shtetrrethim në orët 18:00 në fundjavë dhe ndalimin e tubimeve në shtëpi.
Mitsotakis kishte udhëtuar në ishujt Ikaria, Thymaina dhe Fournoi me zyrtarë të tjerë për të mbikëqyrur procesin e vaksinimit kundër COVID-19 dhe për të promovuar projekte zhvillimi.
Ish kryeministri dhe udhëheqësi i partisë kryesore të opozitës Syriza, Aleksis Tsipras, tha se Mitsotakis kishte treguar “arrogancë të thellë”.
Zëdhënësi i qeverisë Christos Tarantilis u përgjigj se kryeministri kishte qëndruar për një “meze të lehtë dhe një vakt të shkurtër” dhe se kritikat e opozitës ishin “të pasakta”.
“Vakti u mbajt në ambient të hapur me maska, të cilat u hoqën vetëm gjatë vaktit,” tha Tarantilis në një deklaratë për Euronews.
Në dhjetor, Kryeministri Mitsotakis u kritikua ashpër për pozimin e tij pa një maskë fytyre së bashku me pesë motoçiklistë gjatë një udhëtimi me biçikletë malore me gruan e tij në malin Parnes, 45 km nga shtëpia e tij në Athinë. Mitsotakis më vonë pranoi se ai kishte gabuar që u fotografua pa maskë.
