Sekretari i përgjithshëm i NATO-s, Jens Stoltenberg, propozoi rritjen e fondeve të aleancës ushtarake për aktivitetet e parandalimit dhe mbrojtjes, raporton Anadolu Agency (AA).
Duke folur në një konferencë shtypi përpara takimit të ministrave të mbrojtjes të NATO-s, Stoltenberg zbuloi sugjerimet e tij për Strategjinë 2030 të NATO-s.
“Më shumë shpenzime së bashku do të tregonte forcën dhe përkushtimin ndaj nenit 5, premtimit tonë për të mbrojtur njëri-tjetrin. Kjo gjithashtu do të kontribuonte në ndarjen më të drejtë të barrës”, tha Stoltenberg mbi propozimin e tij për rritjen e fondeve të NATO-s.
Rritja do të mbështesë zbarkimet në grupet e betejës në vendet lindore të NATO-s, si dhe misionet dhe stërvitjet e patrullimit ajror dhe detar.
“Ne gjithashtu duhet të kemi një qasje më globale për t’u marrë me sfidat globale, pasi Kina dhe Rusia janë në krye të një zmbrapsje autoritare kundër rendit të bazuar në rregulla”, theksoi Stoltenberg.
Sekretari i Përgjithshëm i NATO-s gjithashtu propozoi që aleanca ushtarake të adresojë sfidat e ndryshimeve klimatike dhe të përmirësojë qëndrueshmërinë e vendeve anëtare ndaj sfidave moderne, duke filluar nga kërcënimet kibernetike deri te pandemitë.
Ministrat e mbrojtjes të NATO-s do të mbajnë një video-konferencë të mërkurën dhe të enjten. Ministrat do të fillojnë përgatitjet për samitin e udhëheqësve të NATO-s që do të organizohet më vonë këtë vit, ku do të diskutojnë strategjinë e aleancës ushtarake për dekadën e ardhshme.
I pyetur në lidhje me tërheqjen e trupave të NATO-s nga Afganistani, Stoltenberg tha: “Ne nuk do të largohemi deri sa nuk do të jetë koha e duhur”.
“Ne nuk duhet të largohemi në një situatë kur Afganistani po bëhet strehë e sigurt për terroristët ndërkombëtarë, kjo ishte arsyeja pse shkuam atje”, shtoi ai.
NATO ka mbështetur forcat e sigurisë kombëtare në Afganistan që nga viti 2003.
Misioni aktual jo-luftarak ka për qëllim trajnimin, këshillimin dhe ndihmën e forcave dhe institucioneve afgane të sigurisë.
