Kryetarja e LSI-së, Monika Kryemadhi “i ka dalë në mbrojtje” presidentin Ilir Meta, pas akuzave të bëra nga kryeministri Edi Rama se del natën për të bërë fushatë. Ajo flet si bashkëshortja e tij, duke thënë se për aq kohë sa kjo nuk e shqetëson atë se Meta nuk i tregon se ku ikën, nuk ka se çfarë i intereson Ramës.
Në vijim të akuzave të bëra nga mazhoranca, për Kryemadhin, Meta e ka bërë më së miri rolin e një presidenti.
“Unë nuk shikoj ndonjë qamet të madh. Shikoj një shterim të mendimit politik të kryeministrit në ikje. Përveç kësaj shikoj një mungesë qartësie të mendimit dhe llogjikës politike të një kryeministri apo kryetar i partie i cili është në një periudhë fushate.
Nuk mendoj se aty ka krijimin e hapësirave të reja pune për shqiptarët apo sistem arsimor. Apo të fliste për pandeminë. Nuk mendoj që sot shqiptarët po vdesin për shkak të mungesës së shërbimit shëndetësor, se pse presidenti nuk njofton Edi Ramën se ku do të ikë për të kaluar një fundjavë. Nuk shqetësohem unë që jam bashkëshortja e Ilir Metës që nuk tregon se ku po ikën dhe shqetësohet kaq shumë Edi Rama.
Nga ana tjetër mendoj që nuk shikoj një llogjikë dhe mendim politik të një kryeministri apo kryetari partie që pretendojmë që është parti e majtë që të shqetësohet për çështjet e arsimit të të rinjve dhe të rejave, çështjen e shpopullimit të Shqipërisë, se sa të shqetësohet përsa i përket se si presidenti lëvizka natën apo ditën. Unë nuk mendoj se presidenti ka braktisur institucionin e presidencës’, tha Kryemadhi për News 24.
Kjo deklaratë e Ramës ka sjellë reagime të shumta, të cilave Meta nuk ka nguruar që t’i përgjigjet. Kreu i shtetit gjatë konferencës që pati me gazetarët ditën e premte Meta tha se shkon në takime se e kërkojnë qytetarët.
