Sot në “Air Albania” u zbuluan se kush ishin 24 personalitetet e artit dhe politikës shqiptare mbi 80 vjeç, të përzgjedhur nga qeveria për të marrë dozën e parë të vaksinës se Pfizer.
Vaksinimi nisi që prej orës 09:30, kur në ambientet e stadiumit mbërriti e para aktorja Tinka Kurti, e më pas kamerat fiksuan të hynte edhe Margarita Xhepa, regjisori Piro Milkani, Dhimitër dhe Roza Anagnosti, si dhe këngëtari Sherif Merdani.
Pjesë e personaliteteve të moshuar që morën vaksinën ishte edhe ish-presidenti Alfred Moisiu, edhe ish-kryeministri Aleksandër Meksi.
Ndërkohë, Edi Rama iu përgjigj akuzave të presidentit Ilir Meta dhe zërave kritikë në lidhje me vaksinimin selektiv të personaliteteve. Shefi i qeverise i konsideroi këto akuza sulme të neveritshme të pseudo-personaliteteve, teksa tha se nuk ka diferencime.
Sakaq, regjisori Piro Milkani u shpreh i kënaqur që ishte një nga të përzgjedhurit, ndërsa tha se vaksina është e vetmja zgjidhje për pandeminë.
“Jam i kënaqur që e bëra i 6 mijti, them se kam këmbën e mbarë që ata do të bëjnë pas 80-vjeçarë. Sigurisht që vaksina është gjëja më e mirë dhe shpëtimi i vetëm i kësaj pandemie të keqe. Nëse 100 vite më parë, gripi spanjoll shkatërroi njerëzimin, jam optimist se vaksinimi do të na shpëtojë. Punë e tyre. Vaksina është një gjë shumë e mirë”, u shpreh regjisori i njohur.
Përveç personaliteteve, në “Air Albania” janë paraqitur dhe disa të moshuar të tjerë veteranë lufte apo mjekë në pension.
Përzgjedhje e personave që u vaksinohen para kategorive specifike të evidentuar në planin kombëtar të vaksinimit është e paprecedentë dhe nuk ka ndodhur në asnjë vend tjetër të botës.
