Vangjel Tavo është në panik nga humbja e 25 prillit. Haptaz ai ka dalë sot me thirrje për emigrantët që të vijnë të votojnë dhe thyejnë vendimin e Komitetit të Ekspertëve, i cili ka vendosur që kush hyn në territorin shqiptar duhet të karantinohet. As si mjek dhe as si njeri i ligjit, Vangjel Tavo mashtron emigrantët duke iu thënë se nuk i detyron asnjë ligj që të karantinohen. Kur në fakt është e kundërta. Vendimi i para disa ditëve detyron 2 javë karantinë për cdo shtetas që hyn në Shqipëri nga Greqia dhe Maqedonia e Veriut pasi këto shtete kanë rritje të frikshme të rasteve me Covid. Më poshtë deklarata e plotë e Vangjel Tavos, ku gënjën emigrantët dhe bën thirrje që ata të sfidojnë vendimin e Komitetit të Ekspertëve.
Të nderuar emigrantë. Ejani e votoni. Nuk ka asnjë ligj që ju pengon dhe ju detyron të karantinoheni. Formularët në kufi janë të paligjshëm ndaj nuk jeni të detyruar t’i plotësoni. Vetëm kaq mund të përgjigjeni verbalisht e jo me shkrim: Nuk rezulton një akt në fuqi që detyron karantinimin tim ✅ Kaq. Ejani emigrantë e votoni. Ejani të festoni Ringjalljen e Krishtit dhe çlirimin e Shqipërisë më 25 prill nga diktatura. I drejtohem Policisë së Shtetit dhe Kufitare, cilido prej jush që ndalon në mënyrë të paligjshme shtetasit shqiptarë që kthehen në atdhe, i detyron të firmosin formularë të paligjshëm do shkarkoheni më 26 prill për abuzim me detyrën dhe do procedoheni penalisht. Salca e Kosit që ju detyron sot nuk do jetë më 26 prill, do ketë qeveri të re, Ministër të Brendshëm të ri, drejtësi funksionale, ndaj mos u largoni edhe ju me atë apo të penalizoheni prej frikës së tij, por zbatoni detyrën me përpikmëri në përputhje me ligjet e vendit dhe Kushtetutën e Republikës së Shqipërisë. “Krishti u ngjall” do jetë urimi me emigrantët më 2 maj, dhe “Diktatura ra,” do jetë jehona më 25 prill në mbarë vendin.
