Rekordmenët e golit, dy legjendat e Premier League hyjnë në histori

Thierry Henry dhe Alan Shearer janë bërë dy lojtarët e parë që futen në “Hall of Fame” të Premier League. Llogaria përkatëse zyrtare në Twitter e njoftoi lajmin këtë të hënë në mëngjes: “Dy qendërsulmues, të dy të talentuar, me aftësi natyrore dhe talent, që kanë shkruar emrat e tyre në historinë e Premier League. Ne jemi të kënaqur të shpallim Alan Shearer dhe Thierry Henry si dy përfaqësuesit e parë të #PLHallOfFame”.
Shearer është golashënuesi më i mirë i të gjitha kohërave në Premier League, me 260 gola. Ai fitoi Premier League me Blackburn më 1995, para se të shijonte një karrierë të suksesshme në 10 sezone me klubin e tij të fëmijërisë, Newcastle.
“Kur shikoni disa nga lojtarët e pabesueshëm që kanë lumturuar Premier League javë për javë, muaj për muaj, viti për vit; unë ndjehem shumë i nderuar që bëhem pjesë e ‘Hall of Fame’. Duhet të falënderoj të gjithë ish-shokët e mi të ekipit, si dhe menaxherët dhe trajnerët me të cilët kam punuar, – tha Shearer për “Sky Sports”. – Gjithçka që kam dashur ndonjëherë të jem ishte futbollisti profesionist. Ishte ëndrra ime ta bëja këtë, ëndrra ime për të fituar trofe, ëndrra ime për të shënuar në ‘St James Park’, të mbaja numrin 9 në fanellën bardhezi”.
Henry fitoi dy tituj të Premier League me Arsenalin dhe shënoi 175 herë në 258 ndeshje. “Të futesh në ‘Hall of Fame’ së bashku me Alan Shearer, si dy lojtarët e parë të Premier League, është mëse e veçantë, – tha francezi për “Sky Sports”. – Kur isha i ri, thjesht përpiqesha të shënoja sa më shumë, ndërsa tani po flasim për ‘Hall of Fame’. Gjatë karrierës sime doja të luaja fort dhe luftoja për kauzën e klubit, sepse kjo është gjithçka që tifozët duan të shohin. Nëse do të më pyesnit në fillim të karrierës sime për hyrjen në ‘Hall of Fame’ nuk do ta kisha besuar. Është një nder i mrekullueshëm”.
Urime të dyve. Shumë e merituar për dy legjenda të Premier League.