Për herë të parë pas kaq shumë kohësh në Aeroportin e Gjirokastrës do të ulen sërish avionë. Bëhet fjalë për një ulje të avionëve të vegjël sportivë në kuadër të një eventi me rastin e festës kombëtare të Italisë. Lajmin e njoftim kryebashkiaku Flamur Golemi përmes një postimi në faqen e tij e në Facebook. Golemi nuk jep shumë të dhëna, por shkruan se ka për të qenë një aktivitet i veçantë.
Postimi i plotë
Më 5 qershor në Aeroportin e Gjirokastrës do të kemi një event të veçantë që po e organizojmë me Ambasadën Italiane. Përkon natyrisht me festën kombëtare të Italisë dhe angazhimin tonë për të intensifikuar më tej bashkëpunimin në fushën e turizmit, kulturës e arsimit. Duam t’i çojmë në një dimension tjetër raportet tona. Deri më tani kemi bërë shumë, por ka ende një hapësirë të madhe për t’u shfrytëzuar ndaj po bëjmë gjithçka duhet në këtë drejtim. Falenderoj ambasadorin Fabrizio Bucci, një mik i shquar i Gjirokastrës, për gjithë mbështetjen që ka dhënë e po jep në disa projekte të rëndësishme. Kujtoj këtu se falë mbështetjes italiane rikonstruktuam teatrin “Zihni Sako”, një investim i mezipritur e që do ta inagurojmë shumë shpejt. Në Gjirokastër do të kemi gjithashtu një qendër kulturore italiane (Casa d’Italia), që do të shërbejë si një mekanizëm i ri për të intesifikuar më tej bashkëpunimin dhe për të çuar përpara nisma e projekte të interesit të përbashkët. Një mirënjohje të madhe publike për ambasadorin Fabrizio Bucci, për suportin dhe gatishmërinë që ka treguar në çdo rast kur është fjala për nisma e projekte që i shërbejnë dy popujve tanë dhe miqësisë mes dy vendeve fqinje.