Sali Berisha, ka shkëputur një video-mesazh nga 25-vjetori i themelimit të Partisë Demokratike, nëpërmjet të cilit shprehet se edhe nëse do të mbeten 1 person ai do të qëndrojë, duke dhënë kështu një mesazh se do të qëndrojë deri në fund për ata që e kanë mbështetur.
“Sikur 1000 të mbesin do të mbetem njëri prej jush, sikur 100 të mbeten do mbetem një prej jush, sikur vetëm një të mbesë do të mbetem njëri prej jush. Rroftë Partia Demokratike”, shprehet Berisha në videon e publikuar.
Reagimi i Sali Berishës vjen dy ditë pas konfirmimit të Lulzim Bashës si kryetar i Partisë Demokratike, në një proces zgjedhor të mbushur me manipulime flagrante. Një prej tyre ishte zhdukja e 25 mijë anëtarëve të PD-së, të cilët ose janë larguar nga PD, ose janë hequr me qëllim nga listat e votuesve nga ana e Lulzim Bashës.
Ndaj mesazhi i Berishës duket se ka lidhje pikërisht me këtë, pasi sipas tij, edhe sikur 100 vetë të mbeten në PD, ai do të jetë aty. Por ky mesazh mund të shihet edhe si një sfidë ndaj SHBA-së dhe si një objektiv i Berishës, që do të kërkojë ta përdorë PD-në për t’u mbrojtur. Nuk ka rëndësi nëse ajo shkrihet e mbetet me 100 vetë. Për të, rëndësi ka që PD të jetë në krah të tij, pasi ai nuk ka ndërmend të largohet. Madje, edhe nëse mbesin edhe vetëm 100 vetë. Mesazhi pra është i qartë!
