Pak ditë pas njoftimit të Ministrisë së Jashtme për hapjen e pikave kufitare me Greqinë qytetarët shqiptarë po përballen me pengesa dhe po detyrohen të kalojnë doganën në këmbë. Autoritetet greke nuk lejojnë kalimin e autobusëve nga Shqipëria, duke i detyruar udhëtarët të ecin rreth 1 kilometër në këmbë. Për shkak të këtyre problemeve nga Kakavija nuk kalojnë më shumë se 900 persona në ditë.
Qytetarët shqiptarë po detyruan të ecin në këmbë në pikat kufitare me Greqinë pavarësisht njoftimeve të Ministrisë së Jashtme se duke nisur nga data 19 qershor, lëvizja në kufi do të lejohej pa pengesa.
Pala greke njoftoi disa ditë më parë lehtësimin e masave në pikat doganore. Në pikën e kalimit kufitar të Kakavijës këto masa nuk janë vënë në zbatim, rreth 980 emigrantë të cilët kanë kaluar në 24 orët e fundit, janë detyruar të përshkojnë mbi 1 kilometrër në këmbë pavarësisht temperaturave të larta.
Autobusë që transportojnë udhëtarë shqiptarë nuk lejohen të kalojnë në pikën kufitare, ndaj stacioni i fundit i tyre është Kakavija. Kompanitë e udhëtimit, shprehen të shqetësuar për këtë situatë e cila po i penalizon prej një viti.
“Na penalizon se po vijmë deri këtu dhe kthehemi.”
Qytetarët që duhet të ecin në këmbë për të kaluar pikën doganore, e më pas të marrin një tjetër autobus në territorin grek, thonë se nuk kanë asnjë zgjidhje tjetër veç të pranojnë urdhrat e doganierëve.
“Do ecim në këmbë, për fëmijët do të bëjmë sakrificë.”
Në pikën e kalimit kufitar të Kakavijës kuota ditore e përcaktuar është 1500 persona por për shkak të këtyre problemeve numri i lëvizjeve nuk i kalon 900 vetë në ditë, ndërkohë e mbyllur vijon të jetë edhe Kapshtica ku lejohet të kalojnë vetëm personat që kanë një kontratë pune në Greqi. /ora
