Tetëmbëdhjetë djem, të moshës midis 7 dhe 16 vjeç, humbën jetën dhe 16 të tjerë u plagosën pas zjarrit që ra në një shkollë të arteve marciale në Kinën Qendrore. Lajmi u raportua nga mediat e huaja të cilat citojnë autoritetet lokale. Përgjegjësi i objektit, që ndodhet në provincën Henan, u arrestua. Sipas raporteve të mediave lokale, shumica e viktimave janë nxënës të shkollës.
Henan është vendlindja e arteve marciale tradicionale kineze dhe është shtëpia e shumë akademive kung fu. Ndër më të mëdhatë është Shkolla e famshme e Arteve Marciale Shaolin, e cila ka qindra mësues dhe dhjetëra mijëra studentë, sipas faqes së saj të internetit.
Manastiri Shaolin në qytetin e Dengfeng është gjithashtu i famshëm për murgjit e tij luftarakë.
