Fanella e Zidanit nga finalja e Botërorit 1998 shitet me shifrën marramendëse

Një nga fanellat e realizuara për Zinedine Zidane për finalen e Botërorit të vitit 1998 është shitur në një ankand në Los Angeles për më shumë se 100 mijë dollarë, njoftoi shtëpia e njohur e ankandeve, Julien’s Auctions.
Pavarësisht se si FIFA dhe UEFA kanë vërtetuar se fanella ishte origjinale, organizatorët e ankandit nuk kanë mundur të japin një përgjigje nëse ajo është veshur nga Zidane në atë përballje historike që u fitua 3-0 nga Franca, me dy gola të Zidane të shënuar në pjesën e parë. Në tetor të vitit 2018, shoqëria pariziene e ankandeve, Coutau-Be’garie, u detyrua të tërhiqte një fanellë të paraqitur si të Zidane (të veshur në finale) për shkak të dyshimeve që lindën për origjinalitetin e saj.
Modeli i shitur këtë të diel u shit saktësisht 108 800 dollarë (92.200 euro) nga Julien’s Auctions, që e kishte vlerësuar nga 80 000 deri 120 000 dollarë.