Një 39-vjeçar në Vlorë është arrestuar nga policia pasi ka kërcënuar vëllanë e tij me hanxhar. Policia ka marrë informacion se dy vëllezërit po konfliktoheshin në banesën e tyre dhe mënjeherë ka ndërhyrë duke vënë në pranga 39-vjeçarin. Materialet procedurale i kaluan Prokurorisë pranë Gjykatës së Shkallës së Parë Vlorë, për veprën penale “Dhuna në familje”.
“Policia e Vlorës parandalon një ngjarje kriminale në familje, ndërhyrja në kohë dhe me profesionalizëm e shërbimeve të Policisë parandaloi përshkallëzimin e mëtejshëm të ngjarjes. Kanosi me mjet prerës vëllanë e tij, vihet në pranga 39-vjeçari.Sekuestrohet një mjet prerës (hanxhar).
Shërbimet e Komisariatit të Policisë Vlorë, pas njoftimit se në lagjen “24 Maji”, në ambientet e banesës, shtetasi G. M. kishte ushtruar dhunë fizike dhe po kanoste me mjet prerës (hanxhar) vëllanë e tij, menjëherë kanë shkuar në adresën e dhënë, duke parandaluar përshkallëzimin e mëtejshëm të dhunës dhe ngjarjen e mundshme. Punonjësit e Policisë së Patrullës së Përgjithshme kanë bërë të mundur neutralizimin dhe prangosjen e shtetasit G. M., në banesë.
Në përfundim të veprimeve, nga specialistët për Hetimin e Krimeve në Komisariatin e Policisë Vlorë u bë arrestimi në flagrancë i shtetasit G. M., 39 vjeç, banues në Vlorë. Materialet procedurale i kaluan Prokurorisë pranë Gjykatës së Shkallës së Parë Vlorë, për veprën penale “Dhuna në familje”, njofton policia
