Dy personat që kanë humbur jetë në aksidentin pasditen e sotme në Marinëz janë punonjës të një kompanie sigurimi që operon në këtë zonë. Ka qenë pikërisht kjo kompani që kanë njoftuar policinë për ngjarjen e rëndë. Nëpërmjet lokalizuesve të GPS, kompania konstatoi se për disa kohë, makina nuk lëvizte në hartë.
Kjo ka sjellë shqetësimin e tyre të cilët shkuan në vendngjarje dhe kanë gjetur makinën e përmbysur në kanalin vaditës.
Ata kanë lajmëruar policinë për të ardhur në vendngjarje dhe për të filluar hetimet.
Makina është gjetur rreth orës 13:00 pasditen e sotme në zonën e Marinzës në një kanal vaditës në këtë zonë.
Policia ka arritur të nxjerrë nga kanali makinën si dhe trupat e pajetë të dy viktimave. Viktimat nuk janë identifikuar ende, por mesohet se bëhet fjalë për dy persona të moshave rreth 50 dhe 30 vjeç.
