Basha: S’ka për të pasur kurrë Kuvend që shqyrton vendimet e SHBA, unë s’jam as kukull e Berishës dhe as peng i Ramës

Kreu i Partisë Demokratike, Lulzim Basha në një deklaratë për mediat në hyrje të selisë blu deklaroi se s’ka për të pasur kurrë Kuvend që shqyrton vendimet e qeverisë amerikane.
iBasha a ka bërë të qartë Sali Berishës se një mbledhje të Kuvendit Kombëtar të Partisë Demokratike për të shqyrtuar vendimin për përjashtimin e Berishës nuk do të ketë.
Sipas tij, Kuvendi i PD nuk mund të shyrtojë vendimet e Qeverisë amerikane.
“Për 8 vite me radhë Edi Rama më ka akuzuar për kukull të Sali Berishës. Dje, Sali Berisha më ka akuzuar për peng të Edi Ramës.
E para është gënjeshtër, e dyta nuk do të ndodhë kurrë. Të dyja janë dy anë të të njëjtës medalje.
Partia Demokratike po ecën përpara, Partia Demokratike do t’i prijë betejës popullore për ndryshim që vjen vetëm përmes largimit të këtij regjimi dhe kthimit të vendit në shinat e demokracisë të cilat sigurojnë një jetë të mirë për çdo shqiptar.
Ky është misioni i Partisë Demokratike, ky është misioni i çdo demokrati, ky është misioni im dhe këtij do t’i qëndroj me përkushtim deri në arritjen e objektivave që nuk janë thjesht partiake.
Sa u përket pretendimeve për referendume dhe kuvende, kuvend të Partisë Demokratike për të marrë nën shqyrtim vendimet e qeverisë amerikane nuk ka për të patur.
Objektivat tona janë përballja me Edi Ramën dhe regjimin e tij dhe e gjithë energjia jonë është e fokusuar këtu.
Nuk ka për të patur kuvend të Partisë Demokratike që shqyrton vendimet e qeverisë amerikan!”, tha Basha në komunikimin me gazetarët.