Kim Yo Jong, motra më e vogël e udhëheqësit të Koresë së Veriut Kim Jong Un, është emëruar në organin më të lartë qeverisës të kombit, sipas mediave shtetërore të vendit. Në njoftimin e botuar në gazetën shtetërore të Koresë së Veriut KCNA shkruhej se Kim Yo Jong tani është anëtare e Komisionit për Çështjet e Shtetit (SAC), organi qeverisës i vendit i kryesuar nga vëllai i saj, shkruan CNN
Kim Yo Jong ishte tashmë një nga figurat më të rëndësishme politike të vendit dhe këshilltare kryesore e vëllait të saj, por një vend në SAC është pozicioni më i lartë zyrtar që ajo ka mbajtur deri më tani. Gjithashtu së bashku me të u emëruan edhe 7 persona të tjerë, megjithëse Kim Yo Jong ishte gruaja e vetme. Nëntë anëtarë dolën në pension, përfshirë 82-vjeçarin Pak Pong Ju, politikë-bërësin ekonomik të Kim Jong Un gjatë dekadës së fundit.
Ri Pyong Chol, shefi i programit të armëve të Koresë së Veriut dhe komandanti kryesor ushtarak nën udhëheqjen e Kim Jong Un gjithashtu doli në pension. Vendin e tij e zuri gjenerali ushtarak Pak Jong Chon, i cili kishte mbikëqyrur zhvillimin e armëve të reja për vendin. Në fillim të kësaj jave, Pak mbikëqyri një test të asaj që Koreja e Veriut pretendonte se ishte raketa e saj e parë hipersonike, e cila nëse është e vërtetë ka potencialin të jetë një nga armët më të shpejta në botë dhe mund të pajiset me një kokë bërthamore, sipas ekspertëve.
Lajmi për emërimin e Kim Yo Jong erdhi pasi Kim Jong Un tha përpara asamblesë të mërkurën se do të rikthente linjat e ndërprera të komunikimit me Korenë e Jugut në fillim të tetorit, raportoi KCNA.
Kjo konsiderohet shumë e rëndësishme sepse ato mund të ndihmojnë në parandalimin e një konfrontimi ushtarak. Në përgjigje, qeveria e Koresë së Jugut tha se do të fillojë përgatitjet dhe pret me padurim “përmirësimin e marrëdhënieve”. Koreja e Veriut ndërpreu linjat e komunikimit në qershor të vitit të kaluar. Të dy vendet rivendosën komunikimin e drejtpërdrejtë këtë korrik, por u ndërprenë vetëm pas një muaji, raporton abcnews.al
Pse është emërimi i Kim Yo Jong kaq i rëndësishëm?
Emërimi i Kim Yo Jong duket se çimenton zyrtarisht rolin e saj në udhëheqjen e Koresë së Veriut. Ajo besohet të jetë një nga më të besuarat e vëllait të saj. Vitin e kaluar, Shërbimi Informativ Kombëtar i Koresë së Jugut e vlerësoi atë si “de facto të dytin në udhëheqje” të vendit – por statusi i saj zyrtar ka qenë gjithmonë i paqartë .
Si propagandistja kryesore e Koresë së Veriut, Kim Yo Jong ishte fytyra e delegacionit të vendit në Lojërat Olimpike Dimërore 2018 në Pyeongchang. Ajo ndihmoi në krijimin e bazës për samitin e parë midis Moon dhe vëllait të saj dhe ishte në krah të Kim Jong Un në Singapor kur takoi Presidentin e atëhershëm amerikan Donald Trump.
Në vitin 2020, agjencia e spiunazhit të Koresë së Jugut u tha ligjvënësve se ajo ishte në krye të marrëdhënieve me Korenë e Jugut dhe Shtetet e Bashkuara. Kohët e fundit, si zëvendësdrejtore e departamentit të Komitetit Qendror të Partisë së Punëtorëve të Koresë, ajo ka bërë deklarata të ashpra publike mbi marrëdhëniet ndër-koreane, administratën e re të Biden dhe ka mbështetur testimet e raketave të Koresë së Veriut, raporton abcnews.al
Javën e kaluar, Kim Yo Jong i kërkoi Koresë së Jugut të bënte “zgjedhjen e duhur” nëse dëshironin vërtet përmirësim të marrëdhënieve ndër-koreane, përfshirë një samit të dytë. Ajo gjithashtu paralajmëroi SHBA-në dhe Korenë e Jugut që të ndalojnë politikën e tyre “armiqësore” kundër Koresë së Veriut, para se të rinisin diskutimet mbi një propozim të Presidentit të Koresë së Jugut për të shpallur fundin e luftës midis Veriut dhe Jugut.
Por ngritja në detyrë e Kim Yo Jong në krye nuk ka qenë e qetë. Në fillim të këtij viti, ajo u hoq nga detyra si anëtare nga Byroja Politike e Koresë së Veriut. Analistët në atë kohë thanë se diçka e tillë kishte të bënte më shumë me fokusin e Kim Jong Un në riorganizimin e byrosë politike për të përfshirë më shumë ekspertë ekonomikë.
Të tjerët spekuluan se ajo mund të ketë marrë përvojën e duhur për trajtimin e marrëdhënieve ndër-koreane verën e kaluar, kur ajo i drejtoi forcat e armatosura të Koresë së Veriut të shpërthenin një zyrë të përbashkët prej 8 milion dollarësh në qytetin e Kaesong për të shprehur pakënaqësinë e Pyongyang me Seulin.
