Luftëtari ka zhvilluar edhe dje seancën e radhës stërvitore nën drejtimin e Petraq Meçit, trajnerit që shpalli kampion të rinjtë gjirokastritë në sezonin e fundit. Ashtu si në ditën e parë, edhe të enjten kishte vetëm një mungesë, pikërisht Kristal Abazaj. Sulmuesi elbasanas ka marrë leje në klub dhe sipas burimeve zyrtare pritet të mbërrijë sot në Gjirokastër për të nisur përgatitjet me grupin.
Ndërkohë, dje lojtarët janë parë më të qetë në stërvitje, në një kohë që edhe interesi i tifozëve ishte më i madh. Takimi me presidentin Grigor Tavo ka bërë që futbollistët të marrin garanci për të ardhmen, teksa hijet e dyshimit tashmë kanë rënë poshtë. Kreu i klubit ka siguruar ekipin jo vetëm për financat, por duke i konfirmuar se objektivat e Luftëtarit do të jenë për Kupat e Europës edhe sezonin e ardhshëm.
Pasi premtoi se në një afat të shkurtër do të shlyhen rrogat, mësohet se Tavo u bëri të ditur lojtarëve se deri të martën do të zgjedhë trajnerin e ri. “Panorama Sport” zbulon se në krye të Luftëtarit do të jetë sërish një serb që do të pasojë Mladen Milinkoviçin. Emri për momentin mbahet sekret, në një kohë që ditët e fundit kanë qarkulluar si kandidatë Bledar Devolli dhe Arjan Bellai.
