Pas emërimit si trajner i ri i Kukësit, Mladen Milinkoviç ka bërë disa kërkesa konkrete për merkaton te drejtuesit e klubit. Në fakt, deri më tani është afruar me pëlqimin e serbit ish-kapiteni i Vllaznisë, Ndriçim Shtubina. Ndërsa me miratimin e ish-trajnerit Ernest Gjoka është afruar talentin etiopian, Beneyam Belye Demte, me të cilin klubi kishte arritur marrëveshje kohë më parë.
Preferencat e Milinkoviç janë që të afrojë te Kukësi dy lojtarë, të cilët i ka pasur te Luftëtari. Bëhet fjalë për qendërmbrojtësin kamerunas Edi Nikolas Bojom, si dhe sulmuesin nga Mozambiku, Arturo Rexhinaldo. Mësohet se klubi është pranë marrëveshjes me dy lojtarët, pasi gjithçka bëhet më e lehtë edhe për faktin se ata menaxhohen nga kompania që ka sjellë te Kukësi vetë trajnerin Milinkoviç.
Mirëpo, “Panorama Sport” zbulon se në bisedat e fundit që trajneri ka bërë me drejtuesit, i ka kërkuar mesfushorin Dejvi Bregu, i cili në fakt është nën kontratë me klubin e Luftëtarit. Vlonjati ka qenë edhe preferencë e vetë presidentit Safet Gjici, por gjithçka është në dorë të gjirokastritëve, që kërkojnë afro 200 mijë euro për ta lënë të lirë “xhevahirin” e tyre.
