Ish-ambasadori shqiptar në SHBA, Fatos Tarifa thotë se është absurde të mendosh që Shtetet e Bashkuara të Amerikës e kanë shpallur non grata Sali Berishën për shkak të miliarderit George Soros.
“Kush është zoti Soros? Një i moshuar, 97 vjeç, kush pyet për të në Departamentin e Shtetit? Ne Sorosit duhet t’i ngremë një bust të vogël këtu, jo një monument të madh, një bust të vogël për atë çfarë ai ka bërë kundër komunizmit për zhvillimin e demokracisë dhe shoqërisë së hapur në Europën lindore.
Antikomunist ka qenë Sorosi gjithmonë, Tani komunistët po shajnë një antikomunist, kjo po ndodh. Në një kohë kur është një alibi që nuk e blen askush. Domethënë “Berishën nuk e do Ameirka për shkak të Sorosit”, është për të qeshur”, tha Tarifa në studion e “Dita jonë”, në A2 CNN.
Tarifa shtoi se Amerika nuk mund të tërhiqet nga ajo çfarë ka vendosur për ish-kryeministrin. “Nëse Sali Berisha është vlerësuar si non grata nga Shtetet e Bashkuara, nuk ka kthim pas, ai është i tillë. Deklarata më e habitshme dhe më e pritshme ishte ajo e ambasadores Kim se ky njeri përbën rrezik për interesin kombëtar amerikan.
Aksioni i kohëve të fundit i Sali Berishës pengon zhvillimin enjë opozite të fortë. Opozita tani është e dobët. Mua më habit akoma ajo shpurë njerëzish që i shkojnë akoma pas Sali Berishës. Kaq naivë mund të jenë këta njerëz që nuk e kuptojnë që, nëse nuk të do Amerika, mbaroi. Është kaq e thjeshtë”, tha Tarifa.
