Pas deklaratave në media, drejtuesit e klubit të Luftëtarit kanë vendosur ta çojnë deri në fund çështjen e ish-trajnerit të tyre, Mladen Milinkoviç, i cili, në bazë të kontratës që ka pasur me klubin duhet të qëndronte edhe për një sezon te bluzinjtë. Por, një gjë e tillë nuk ka ndodhur dhe Milinkoviç ka nisur punën te skuadra e Kukësit, gjë e cila nuk është pritur shumë mirë në Gjirokastër.
Klubi bluzi ka depozituar ditët e fundit një shkresë në FSHF, në bazë të së cilës bën me dije se Milinkoviç vazhdon të jetë më ta nën kontratë dhe nuk mund të largohet, pa marrë më parë lejekalimin. Ndërsa për faktin që trajneri serb ka nisur punën te Kukësit, Luftëtari ka kërkuar një dëmshpërblim prej 100 mijë eurosh. Në një situatë të tillë, drejtuesit verilindor, për momentin janë në heshtje dhe nuk kanë folur në lidhje me këtë çështje.
Nga frika se mund të përballen me një situatë disi delikate, ata ende nuk e kanë depozituar në FSHF kontratën që kanë lidhur për sezonin e ri futbollistik me trajnerin, i cili është prezantuar para mediave dhe ka nisur nga puna, duke stërvitur normalisht ekipin. Tashmë pritet që Dhoma e Zgjidhjes së Konflikteve pranë FSHF-së të vendosë për pretendimet e Luftëtarit, gjithmonë në rast se mes palëve nuk arrihet një akord paraprak.
