Partia Demokratike në Gjirokastër po mundohet prej disa ditësh të bëjë një deklaratë kundër bashkisë, për të denoncuar sipas saj abuzimin me punimet për ndërtimin e Bypass-it në zonën muzeale të qytetit. Problemi është se nuk gjejnë dikë që ta lexojë, duke treguar edhe njëherë fundin që ka prekur kjo forcë politike, e cila në gjendjen që është kurrsesi nuk mund të jetë dot një alternativë përballë qeverisë.
Me udhëzim nga lart prej të ashtuquajturit Komiteti i Rithemelimit të PD, është kërkuar nisja e një sulmi publik kundër bashkive, të cilat prej 2019 qeverisen nga Partia Socialiste. Kjo është e kuptueshme për të karrikuar elektoratin dhe për të mbajtur ndezur situatën kur në pranverë të vitit të ardhshëm kemi zgjedhjet lokale. Kryetari i sapozgjedhur i demokratëve në Gjirokastër ka refuzuar ta lexojë deklaratën për çështjen në fjalë.
Fill pas kësaj u shfaqën disa “dalzotës” të tjerë që thanë se do të merrnin përsipër denoncimin kundër Bashkisë Gjirokastër. Por kanë kaluar 3 ditë dhe ende nuk është bërë deklarata. Jo se s’kanë çfarë të thonë, por nuk gjejnë njeri të dalë të flasë. Për fatin tonë të keq, njerëzit në PD sot janë në nivelet më të ulëta të kurajos politike dhe kredibilitetit për të bërë opozitarizëm. Nëpër zona të vogla sidomos kjo është më e theksuar se askund tjetër. Sa i përkët Gjirokastrës gjendja është aq nderë sa ka filluar të kujtohet si e lavdishme koha kur partinë e drejtonte Dasho Aliko. Se me thënë të drejtën, Dasho vërtet e mbante mirë me socialistët dhe ndonjë punë të vetën e mbyllte lart e poshtë, po të paktën për sy e për faqe para kamerës nuk lodhej së denoncuari qeverinë e bashkinë. Këta të “rithemelimit” apo “foltores” nuk kanë guximin as të dalin të paktën. ©argjiroja.net
