Eni Vasili dhe moderatorja e emisionit “Open” ndërsa ka komentuar ndërhyrjen e IKMT-së për lirimin e bregdetit, deklaroi se “Prestige Resort” është një copë Europë në atë mishmash në të cilën ndodhet Golemi.
Por Vasili harron se Europa nuk e uzurpon bregdetin, nuk e ndan me parcela me blloqe betoni, si “tokë e xanun”, pasi është pronë publike dhe si e tillë u përket të gjithë qytetarëve.
Në vendet bregdetare të Europës asnjë resort nuk hyn në det, siç ka ndodhur me rastin e “Prestig Resort” që ka uzurpuar jo pak por mijëra metra katrorë rërë e det.
Vetëm një gjë të vërtetë ka deklaruar sot gazetarja Vasili, kur tha se është një vend shumë i bukur, por sërish nuk përmendi se si ai vend i bukur u shëmtua nga Irfan Hysenbelliu.
Sipas Vasilit, janë vetëm dy pishina që po prishen, por mesa duket edhe blloqet e betonit gazetarja i sheh si pishina.
“Ajo që shikon sot në ‘Prestige’, aty ku është një vend shumë i bukur një investim fantastik, duket si një copë Europe në mes atij mishmashi që afron Golemi dhe të shohësh ato pamje të vjen keq.
Duket sikur kanë rënë bombat e një lufte. Çdo qytetar ndihet i prekur nga kjo gjë, tani ajo çfarë thua çfarë garancie kam unë.
‘News24’ po reagon në mënyrën e vet dhe po bën shumë mirë. Nuk është thjesht çështje personale”, ka thënë Vasili.
