Vladimir Putin nuk është ftuar për të marrë pjesë në funeralin e Mbretëreshës të hënën në 19 Shtator. Një vendim ky që Kremlini e ka quajtur “imoral” dhe “blasfemues”. Zëdhënësja e Ministrisë së Jashtme Maria Zakharova shpreh Britania po përdor tragjedinë kombëtare për qëllime gjeopolitike.
“Ne e shohim këtë përpjekje britanike për të përdorur tragjedinë kombëtare, e cila ka prekur zemrat e miliona njerëzve në mbarë botën, për qëllime gjeopolitike për të larë hesapet me vendin tonë… si thellësisht imorale. Kjo është veçanërisht blasfemuese ndaj Elizabeth. Nga ana jonë, ne i shprehim ngushëllimet tona të thella popullit britanik për humbjen e madhe që pësoi”, tha Zakharova.
Në funeralin shtetëror do të marrin pjesë, presidentë dhe kryeministra nga e gjithë bota, megjithatë lideri rus thuhet se është shpërfillur për shkak të marrëdhënieve të tensionuara me Mbretërinë e Bashkuar.
Edhe një delegacion i qeverisë kineze është ndaluar që të marrë pjesë në homazhet në nder të Mbretëreshës. Kryetari i Dhomës së Komunave Sir Lindsay Hoyle refuzoi një kërkesë të delegacionit kinez për të hyrë në Uestminster Hall për shkak të sanksioneve kineze kundër 5 deputetëve.
Krerët e shteteve të pothuajse çdo vendi në botë kanë marrë ftesa për ceremoninë, duke përjashtuar Sirinë, Venezuelën, Afganistanin, Rusinë, Bjellorusinë dhe Mianmarin. Britania e Madhe nuk ka marrëdhënie diplomatike me Sirinë dhe Venezuelën, ndërsa është raportuar se Afganistani nuk është ftuar për shkak të situatës aktuale politike.
