Gjirokastra qytet në UNESCO vijon të jetë në vëmendjen e turistëve të huaj. Edhe këto ditë vere grupet me turistë të huaj nuk mungojnë në këtë qytet. Drejtoria Rajonale e Kulturës Kombëtare në Gjirokastër bën me dije se është shtuar interesi i turistëve të huaj për të vizituar qytetin dhe kalanë. “Interes i shtuar i turistëve të huaj, por jo vetëm, për të vizituar Gjirokastrën dhe kalanë e saj dhe këtë e tregojnë më së miri statistikat.
Prej 1 Janarit -13 Gusht 2017, kemi 6673 vizitorë më shumë, se e njëjta periudhë e vitit të kaluar. Vetëm sot patëm 802 vizitorë në kala”, bën me dije DRKK Gjirokastër në materialin e datës 16 gusht, të cilin e ka publikuar dhe Ministria e Kulturës. Kalaja e Gjirokastrës si histori e lidhur me qytetin e Gjirokastrës, përmendet për herë të parë si qytet dhe kështjellë në vitin 1336. Në këto vite, ajo ishte qendra e feudalëve shqiptarë Zenevisë.
Më vonë, gjatë sundimit të Gjin Bue Shpatës, ajo u përfshi në Despotatin e Epirit. E megjithatë historianë të ndryshëm mendojnë se ekzistenca e kalasë së gurtë është më e hershme. Sipas tyre, kalaja ka pas dy faza ndërtimi, të cilat lidhen me periudhën para dhe pas Pashallëkut të Janinës dhe fortesave të Ali Pashë Tepelenës. Gjirokastra ishte një qendër e rëndësishme administrative e shekullit XIX, e populluar nga pronarë tokash. Veçoritë e jetës së kohës në Shqipëri lanë gjithashtu gjurmë në arkitekturën e tyre: nevojiteshin strukturat mbrojtëse, sepse shqiptarët herë pas here luftonin kundër njeri tjetrit; për më tepër ata rebeloheshin kundra Portës së Lartë në Stamboll.
Duhej një vend i sigurt edhe për bagëtinë në dimër; duhej dhe vendi për të rezervuar ujin për gjatë muajve të thatë të verës. Katet përdhese të kullave ishin edhe struktura mbrojtëse edhe magazina të shtëpisë. Ndërsa katet e sipërme shprehnin mikpritjen gjirokastrite, kulturën dhe mënyrën e jetesës së tyre. Për tu nënvizuar është për qendrën historike të Gjirokastrës edhe prezenca e ndërtimeve të stilit italian, të ndërtuar në fillim shekullin e kaluar. Gjirokastra është shpallur qytet-muze në vitin 1963 dhe në vitin 2005 është shpallur pasuri botërore nga UNESCO.
