Pas Belinda Ballukut që ka këshilluar qytetarët të përdorin në mënyrë eficente lavatricen për të kursyer energjinë elektrike, një tjetër ministre e kabinetit “Rama 3” jep këshilla për të kursyer. Mirela Kumbaro në fund të fjalës së saj në konferencën e nëntë mjedisore për Europën nga Organizata e Kombeve të Bashkuara, ku drejtoi edhe njërin prej paneleve me temë “Turizmi i Qendrueshëm dhe Ekonomia Qarkulluese”, nuk hezitoi të bënte edhe një kritikë për organizatorët.
“A mund ta kontrollojmë pak ajrin e kondicionuar në këtë sallë, në mënyrë që të kursejmë energji, që të mbrojmë klimën nga gazet serrë, por edhe sepse është shumë ftohtë. Ky është hapi i parë, përpara se të vazhdojmë të flasim sërish për ekonominë qarkulluese dhe për turizmin e qëndrueshëm në këtë konferencë kaq interesante të UNECE”, tha Kumbaro duke marrë duartrokitjet e sallës së konferencës ministeriale në Nikosia të Qipros.
Gjatë fjalës së saj, ministrja e Turizmit dhe Mjedisit foli për bashkëjetesën e turizmit dhe mjedisit, duke prezantuar rastin e Shqipërisë që bashkon dy sektorët e rënësishëm në një ministri.
“Sfidat e viteve të fundit na tregojnë se luftën për një botë më të mirë nuk e fitojnë numrat, por soliditeti i shoqërive, qëndrueshmëria, solidariteti, largpamësia e zhvillimit të qëndrueshëm. Pra, le të ndryshojmë qëndrimin tonë për të rimenduar turizmin, jo vetëm si një aktivitet udhëtimi, por si një zhvillim i qëndrueshëm që ofron kënaqësi, përgjegjësi qytetare dhe emancipim”, u shpreh Kumbaro në konferencën ministrore.
Sipas raportit të fundit të Organizatës Botërore të Turizmit, Shqipëria pati rikuperimin më të shpejtë në Europë të turistëve ndërkombëtarë krahasuar me vitin 2019, dhe po ashtu ka një rritje të sipërfaqes së zonave të mbrojtura në mbi 21% të territorit.
