Në garën brenda Partisë Demokratike në Sarandë për të nominuar kandidatin për zgjedhjet lokale të 14 majit, kanë nisur të përfliten disa emra të mundshëm. Është fjala për avokatin Ilir Nikolla, i cili garoi edhe në zgjedhjet e 2019 të bojkotuara nga opozita; biznesmeni Armando Magllara; bankieri Ardit Cikuli dhe Ibrahim Bajrami, anëtar i Këshillit Bashkiak Sarandë nga Bindja Demokratike.
Sidoqoftë deri në zyrtarizimin e datës së zhvillimit të primareve do të rrjedhin shumë ujëra dhe emra të tjerë mund të përfshihen në këto zgjedhje të brendshme në radhët e demokratëve. Kandidati që do të nominohet nga opozita pritet të ketë përballë Adrian Gurmën, kryetarin aktual, i cili duket se ka marrë tashmë rikonfirmimin nga Edi Rama.
Ky i fundit do të shkojë në Sarandë më 26 nëntor në kuadër të turit të takimeve që është duke zhvilluar në të gjithë vendin. Nuk është e rastësishme që Rama zgjedh të shkojë vetëm në një numër të caktuar të bashkive nga 61 që janë në total. Kryesisht zhvillon takime në ato njësi ku pritet të rikonfirmojë kryetarët aktualë. Partia Demokratike nga ana tjetër nuk e qeveris Sarandën që nga koha e Edmond Gjokës. ©argjiroja.net
