Çuditërisht Vangjel Tavo duket se i ka mbyllur hesapet me LSI-në dhe kopjen e saj më të shëmtuar se origjinali, Partinë e Lirisë. Qysh prej themelimit të këtij subjekti nga Ilir Meta, Tavo s’ka bërë asnjë reagim publik, së paku në faqen e tij zyrtare, si dhe nuk ka qenë i pranishëm në Konventën Kombëtare që u zhvillua disa ditë më parë në Tiranë. Por Gjirokastra nuk ngeli tërësisht pa përfaqësim në këtë ngjarje politike. Mësohet se të pranishëm kanë qenë Krenar Kulla e Thoma Adrea.
Kulla ka qenë kryetar i LSI në Gjirokastër dhe drejtues i disa institucioneve. Andrea gjithashtu ishte pjesë e strukturave të LSI Gjirokastër dhe anëtar i Këshillit Bashkiak deri në vitin 2019. Ish-kryebashkiakja Zamira Rami mungonte gjithashtu në Konventën e Partisë së Lirisë. Mësohet se në javët e ardhshme në Gjirokastër do të vijë Ilir Meta për takim me strukturat vendore të partisë së tij.
Me gjasë pritet që kryesimin e këtij subjekti opozitar në Gjirokastër ta marrë Krenar Kulla. Mbetet për t’u parë në vazhdim se çfarë roli do të luajë vetë Vangjel Tavo në këtë situatë të re politike. Ndoshta fillimisht ka dërguar Thomain dhe Krenarin te Partia e Lirisë, sa për t’ju dalë “turpi”, pastaj mund t’i bashkohet edhe vetë Ilir Metës në koalicionin e dytë me Sali Berishën. ©argjiroja.net
