I menjëhershëm ka qenë reagimi i klubit të Luftëtarit, nëpërmjet zëdhënësit Rigles Malile, lidhur me pretendimet e avokatit të trajnerit aktual të Kukësit, Mladen Milinkoviç, i cili pretendon se gjirokastritët i detyrohen serbit tre rroga mujore.
“Nisur nga deklarata e avokatit të trajnerit Milinkoviç, zotit Stathis Natsinas, se Luftëtari i detyrohet tri rroga mujore, më duhet të sqarojmë mbarë opinion publik se pretendimet e ngritura nuk janë aspak të vërteta. Trajneri Milinkoviç, si dhe gjithë futbollistëve, në përfundim të kampionatit u është vonuar rroga e fundit mujore.
Në momentin e grumbullimit të ekipit, edhe trajnerit Milinkoviç këto para i kanë kaluar në llogarinë e tij bankare. Këto kanë ardhur për shkak të një vonese proceduriale dhe tashmë çdo gjë është shlyer. Trajneri Milinkoviç kur është larguar nga Luftëtari ka qenë i bindur për të vijuar punën, edhe pse nuk është treguar profesionist, pasi duke qenë nën kontratë me ekipin tonë, më datën 11 qershor ka nisur kontaktet me ekipin e Partizanit.
Ndërsa më datën 15 qershor ka kontaktuar me Kukësin dhe ka mbyllur marrëveshjen. Klubi i futbollit Luftëtari do të vijojë të gjitha procedurat e nevojshme pranë FSHF-së, si dhe strukturat përkatëse në UEFA dhe FIFA. Trajneri Milinkoviç, si dhe përgjegjësi i tij ligjor nuk mund të hedhin baltë mbi Luftëtarin, skuadër që e afirmoi në arenën europiane.
Klubi i Luftëtarit dhe drejtuesit e tij e kanë respektuar trajnerin Milinkoviç për punën e bërë, por s’mund të lejojnë në asnjë moment nëpërkëmbjen e tij. FSHF-ja dhe anëtarët e saj (në këtë rast klubet e futbollit) meritojnë respekt nga çdo ‘Milinkoviç’, apo përfaqësuesit e tij.
Trajneri Milinkoviç, si dhe avokati i tij afruan te Luftëtari në mes të sezonit lojtarë të dëmtuar, të cilët asnjëherë nuk e justifikuan aktivizimin e tyre. Pavarësisht gjithçkaje, këta futbollistë janë paguar rregullisht si gjithë të tjerët, duke mos u pasur asnjë detyrim financiar.
Klubi i futbollit ‘Luftëtari’, në lidhje me deklaratën e përfaqësuesit ligjor të trajnerit Milinkoviç, do t’i drejtohet gjykatës me një padi për dezinformim dhe prishje të imazhit të klubit”, përfundon Malile.
