Për herë të parë një kryeministër grek do të vizitojë Himarën. Kyriakos Mitsotakis do të jetë sot (22 dhjetor) në 3 zona të ndryshme të Shqipërisë. Ai do të niset nga ishulli i Korfuzit me helikopter për të zbritur në Himarë rreth orës 9:30 të mëngjesit. Aty do të zhvillojë një takim në shkollën greke “Omiros”, si dhe bashkëbisedim me banorë vendas para zyrave të OMONIA-s.
Pas rreth një ore ai do të lerë Himarën për të shkuar në Livadhja të Bashkisë Finiq, një zonë ku banon minoriteti grek në vendin tonë. Takimi është menduar të organizohet në qendrën kulturore të fshatit. Rreth mesditës kryeministri grek do të fluturojë në Dropull, ku në fshatin Dervician pritet të ketë një takim me banorë të minoritetit grek. Argjirolajm.net mëson se në Dropull për ta shoqëruar do të jetë edhe kryeministri i Shqipërisë, Edi Rama. Ky i fundit rikthehet në Dropull me një premtim të mbajtur.
Ai do t’i dorëzojë kryebashkiakut të Dropullit një eskavator për nevoja të bashkisë. Kujtojmë që javë më parë kur Rama ishte në Dervician, kryetari i bashkisë i kërkoi një mjet të tillë. Rama do ta shoqërojë Mitsotakis gjatë qëndrimit në Dropull. Më pas rreth orës 14:00 kryeministri i Greqisë përfundon vizitën në jug të Shqipërisë dhe largohet nga vendi ynë. ©argjiroja.net
