Kryetari i Bashkisë Dropull ka publikuar së fundi foto nga një takim në Athinë për ritualin e përvitshëm të prerjes së pitës
“Në Athinë në prerjen e pitës të Shoqatës Kulturore Çatistër “Metamorfoza e Shpëtimtarit”, së bashku me mikun tim të mirë Niko Zeneto. Të pranishëm ishin gjithashtu Nënkryetari i Bashkisë Ilion, Giannis Charalampopoulos dhe Nënkryetari A’ i Kuvendit të Greqisë Nikitas Kaklamanis”, shkruan Toli.
Por çfarë bie në sy nga fotot që ai ka publikuar në Instagram dhe Facebook, është flamuri i të ashtuquajturit “Vorio Epir” pas shpinës së tij. Me siguri që për këtë element do të jenë kujdesur vetë organizatorët e takimit, por publikimi i fotove nga kryetari i Bashkisë Dropull nuk është diçka normale për aq kohë sa ai ushtron funksionin zyrtar.
Dihet që organizata të ndryshme nacionaliste në Greqi ushqejnë vazhdimisht pretendime territoriale ndaj Shqipërisë dhe me retorikën apo aktet e tyre cënojnë raportet e fqinjësisë së mirë mes dy vendeve. Nuk është problem nëse Dhimitraq Toli si individ zgjedh në lirinë e vet të plotë të militojë në këto shoqata e t’i përkrahë ato. Por në detyrën që ushtron si një kryetar bashkie në Republikën e Shqipërisë, sigurisht që ky është një kapërcim i gabuar. ©argjiroja.net
