Rikthehet pista Abazaj, Skënderbeu bën çmos për të bindur drejtuesit e Luftëtarit

Skënderbeu vijon të vëzhgojë nga afër pistën që të çon te Kristal Abazaj. Edhe pse tri ditë më parë kreu i klubit korçar, Ardjan Takaj, theksoi se nuk ka bërë një ofertë zyrtare, burime të sigurta në klub tregojnë se lojtari i Luftëtarit pëlqehet shumë dhe në kampin bardhekuq po mundohem të bëjnë çmos për të bindur drejtuesit e Luftëtarit. Këta të fundit mësohet se kërkojnë minimalisht 200 mijë euro për kartonin e Abazajt. Gjithsesi, duket se presidenti i gjirokastritëve, Grigor Tavo, ka vënë veton. “Nuk ka ardhur asnjë ofertë zyrtare në klub nga Skënderbeu. Pastaj, edhe nëse vjen, nuk bëhet fjalë që të shesim Abazajn apo Bregun në këtë moment. Dy javë më parë refuzuam ofertën e klubit grek, Asteras Tripolis. Gjithashtu, edhe një skuadër kroate na bëri ofertë zyrtare, duke kërkuar në paketë Abazajn dhe Bregun, por e refuzuam”, theksoi dje Tavo për “Panorama Sport”. Tashmë mbetet për t’u parë se si do të rrjedhin ngjarjet.