I gjithë territori i vendit është i përfshirë nga reshjet e shiut. Problematika më të theksuara paraqiten në qarqet e Shkodrës, Kukësit dhe Gjirokastrës. Në komunikatën më të fundit nga Ministria e Mbrojtjes njoftohet se në Këlcyrë ka rrëshqitje të tokës në një sipërfaqe rreth 2 hektarë. Nga rrëshqitja janë prekur 4 banesa dhe 4 stalla bagëtish, ndërkohë që janë evakuuar banorët. Ka ende disa zona pa energji elektrike në Elbasan, Kukës dhe Shkodër.
“Në qarkun e Gjirokastrës, në Bashkinë Këlcyrë, në lagjen Kalemaj, fshati Katundishtë, njësia administrative Deshnicë, ka rrëshqitje dhe fundosje të tokës nga baza rreth 1 m, në një sipërfaqe rreth 2 ha. Brenda kësaj sipërfaqe përfshihen 4 banesa dhe 4 stalla bagëtish. Në vendngjarje ka shkuar një grup pune për konstatimin e dëmeve. Banorët janë evakuuar nga banesat dhe janë strehuar tek të afërmit e tyre”, thuhet në njoftimin e Ministrise se Mbrojtjes. Argjirolajm.net sjell pamje nga pasojat e motit të keq në fshatin Katundishtë.
