Roland Bejko tregon emrat e propozuar për kandidatë të Partisë Demokratike në Gjirokastër dhe Tepelenë, për zgjedhjet e 14 majit.
“Partia Demokratike vazhdon pregatitjet për zgjedhjet edhe në Qarkun e Gjirokastrës.
Në cilësinë e anëtarit të kryesisë së PDSH, së bashku me Prof. Myzafer Elezi, anëtar i Këshillit Kombëtar, ish kandidat për deputet, ishim të dielën mes demokratëve të Tepelenës e Gjirokastrës ku u zhvilluan takime (me dy-tre vetë siç duket dhe në foto) me kryesitë dhe anëtarët e PD-së në këto bashki.
Qëllimi i takimit kish të bënte me konfirmimin e propozimeve për kandidatët për kryetarë bashkie, të propozuar qysh në primaret e 2020-ës, si dhe u bënë propozime të reja.
Në Tepelenë, kandidat për kryetar bashkie u propozua njëzëri Ing. Sokol Guga. Ndërsa, për bashkinë Gjirokastër u propozuan Shemsho Lamaj, veteriner, biznesmen, Matilda Koça, arsimtare dhe Çlirim Rabaj, avokat. Në vazhdim do proçedohet me përcaktimin përfundimtar të kandidatit për kryetar bashkie, dhe listën e këshilltarëve sipas kodit zgjedhor.
Nga takimi u bë thirrje kandidatëve të pjesës tjetër të PD, të foltores, që të marrin në konsideratë ftesën e PD-së për tu bërë së bashku në zgjedhjet vendore të 14 majit. Për këtë qëllim u mandatua edhe një përfaqësi prej pesë anëtarësh të kryesisë që të bisedojnë me palën tjetër për gjetjen e një dakordësie për të dalë definitivisht me një kandidat të vetëm.
Kush do realisht fitoren, nuk besojmë se do guxojë me fudullëk të na shesë dëngla shumice në të gjitha bashkitë e qarkut Gjirokastër, pasi statistikat e zgjedhjeve të më parshme janë një shpullë e fortë për këdo delirant lokal a qendror që beson se një PD e ndarë, do ketë mundësi të fitojnë ndonjë bashki në këtë zonë.
Jemi në pritje të një reagimi serioz e gjithëpërfshirës. Ndryshe, arroganca do marrë mbrapsht koston që i takon, sepse PD do presë një reagim nga pala tjetër deri më dt 20 mars, më tej, do shpallë gjithë kandidatët e vet në bashkitë e këtij qarku si për kryetarë, ashtu dhe për këshilltarë bashkie”, shkruan ai.
