9 prokuroritë e rretheve që do të shkrihen si rezultat i hartës së re gjyqësore, kanë në total mbi 10 mijë dosje që do të transferohen në 13 organet e akuzës që do të mbeten në varësi të rretheve gjyqësore që ka përcaktuar KLGJ.
Të dhënat zyrtare të Prokurorisë së Përgjithshme tregojnë se Lushnja ka numrin më të lartë të dosjeve me mbi 2 mijë që do t’i bashkëngjiten Prokurorisë së Fierit, e cila deri në vitin 2022 numëron mbi 4 mijë çështje të sajat.
Më problematike sa i përket përqendrimit të lartë të numrit të dosjeve është Prokuroria e Tiranës, e cila aktualisht numëron rreth 26 mijë çështje dhe do t’i shtohen 2 mijë të tjera, nga Prokuroria e Krujës.
Kavaja, Pogradeci dhe Kurbini, 3 prokuroritë e tjera që do të shkrihen kanë një numër dosjesh nga 1 mijë e 300 deri në 1600, ato do t’i bashkohen përkatësisht, Durrësit, Korçës dhe Lezhës.
Më pak se 1 mijë dosje kanë Përmeti, Tropoja, Puka dhe Mati, që do t’i bashkohen përkatësisht Gjirokastrës, Kukësit, Shkodrës dhe Dibrës.
Dosjet duhet të jenë transferuar para datës 1 maj dhe sipas udhëzimit të Prokurorisë së Përgjithshme, të 9 prokurorit që do shkrihen duhet të marrin masa për transferimin e dosjeve në mënyrë që të mos cenohet sekreti hetimor./TvKlan
