Kandidati i PD-së për Bashkinë Libohovë, Adil Xhelili, ka reaguar sërish pasi një ditë më parë premtoi shërbime funerali falas nëse do të zgjidhet kryetar në zgjedhjet e 14 majit. Ndonëse e ka shprehur literalisht “Ofrimi FALAS i shërbimit funeral si pjesë e shërbimeve komunale të bashkisë”, Xhelili thotë sot se mediat e kanë deformuar premtimin e tij. Më poshtë sqarimi që Xhelili jep për këtë rast.
Histeria e portaleve apo mediave patronazhiste shtrembërojnë me dashje sidomos në raste fushatash çdo deklaratë apo fjalë. Fjala FALAS u dhemb, e denigrojnë, e përçmojnë sepse janë mësuar që për çdo gjë ka një çmim. Edhe ndarja nga jeta e një familjari ka një çmim shpirtëror, por mos vallë duhet ta ketë dhe monetar?!
Jo të dashur bashkëqytetarë, jo më çmime në kurriz tuaj e as të familjeve tuaja. Ashtu siç kemi për detyrë t’u shërbejmë njerëzve në jetët e tyre, ashtu kemi për detyrë të lehtësojmë çdo lloj fatkeqësie edhe kur dikush ndahet nga kjo botë. Ndaj për këdo që keqkuptohet me apo dashje u them:
Bashkia Libohovë, përmes Shërbimit Komunal do të ndërmarë çdo lloj shërbimi në raste fatkeqësish të ndarjes nga jeta.
Në bashkëpunim me shoqëritë funerale do të ulë kostot dhe do të ofrojë ndihmesë për çdo rast me punë, mjete e njerëz.
Mirëmbajtja e varrezave publike është detyrë parësore e një shërbimi të dedikuar.
Asnjë pagesë nuk do të ketë për ato që do të ofrojë shërbimi komunal në këto raste.
Është në moralin tim që të mos abuzoj me fjalët as duke e quajtur premtim e as duke e quajtur mashtrim për vota, për ata që më njohin e dinë që pesha e fjalës sime rëndon. Në respekt të kujtdo që jeta e ka përballur me fatkeqësi apo do ta përballë, unë do të jem një ndihmë e shtuar në këto raste për të lehtësuar sadopak çdo lloj dhimbjeje. Atyre që u pëlqen ta mendojnë ndryshe, kanë të drejtën e tyre të shprehen, po jo të denigrojnë, kurrë nuk mund të quhet kulturë tallja me këto raste.
