Kryeministri i Greqisë, Kyriakos Mitsotakis, prezantoi tre politika ekonomike që synojnë të rinjtë, nëpunësit civilë dhe pronarët që sigurojnë shtëpitë e tyre kundër fatkeqësive natyrore. Mitsotakis premtoi se do të zbatohet e ashtuquajtura “Youth Pass” për të gjithë ata që mbushin 18 vjeç; ky do të ishte një subvencion vjetor prej 150 € për individ për dy vjet, duke mbuluar shpenzimet për transport, aktivitete kulturore dhe udhëtime. Pa u thelluar në detaje, Mitsotakis tha se kjo do të kushtojë rreth 30 milionë euro në vit.
Kryeministri njoftoi gjithashtu një zbritje prej 10% në taksën e pronës për pronarët e shtëpive që sigurojnë shtëpitë e tyre kundër fatkeqësive natyrore gjatë gjithë vitit. Kjo do të kushtojë 40 milionë euro. Mitsotakis tha gjithashtu se do të sigurohej që nëpunësit civilë, veçanërisht ata me pagë më të ulët, por edhe menaxherët e rangut të mesëm dhe të lartë në “pozitat e përgjegjësisë” të marrin paga më të mira. Ai gjithashtu do të rrisë shtesat për fëmijët duke filluar nga 1 janari 2024. Kreu i ekzekutivit vlerësoi se kostoja vjetore e kombinuar e këtyre masave është 500 milionë euro.
Mitsotakis tha se pagat si në sektorin publik ashtu edhe në atë privat do të rriteshin ndjeshëm në mandatin e tij të dytë katërvjeçar, nëse ai e fiton një të tillë. Ai premtoi se qeveria e tij mund të rrisë pagën mesatare mujore brenda katër viteve të ardhshme me rreth 25%, në 1.500 euro, ndërsa paga minimale do të shkojë afër 950 euro, duke shtuar se rritja e pagës minimale në mandatin e tij të parë tejkaloi angazhimet e tij para zgjedhjeve të fundit, në 2019 – ën.
Paga mujore bruto, para tatimit mbi të ardhurat dhe kontributet e sigurimeve shoqërore, u rrit më 1 prill nga 713 euro në 780 euro. Ishte 650 euro kur qeveria e Mitsotakis mori detyrën në vitin 2019. Partia kryesore e opozitës SYRIZA sulmoi Mitsotakis për deklaratat e tij, duke e akuzuar atë se po përpiqej të blinte votën e 18-vjeçarëve me 150 euro secili dhe se po vepron si “menaxher i kompanive të sigurimit” duke ofruar zbritjen e tatimit në pronë për ata që i japin votën e tyre.
SYRIZA u ka premtuar maturantëve, të cilët do t’u nënshtrohen provimeve pranuese kombëtare në universitete në qershor dhe që të gjithë kanë të drejtë vote, se do t’ua lehtësojë hyrjen në universitet duke hequr notën minimale të kërkuar.
