Teksa votimi elektronik shkaktoi “kaos” në zgjedhjet e sotme në të gjithë vendit, kreu i KQZ Ilirjan Celibashi ka zhbllokuar problematikën duke urdhëruar regjistrimin manual në të gjitha qendrat e votimit që hasen probleme.
Ai ka deklaruar se të gjithë qytetarët që paraqiten për të votuar dhe kanë probleme me pajisjet elektronike të identifikimit, duhet të identifikohen në mënyrë manual.
Problematikat e votimit elektronik kanë shkaktuar një pjesëmarrje të ulët në procesin e votimit, ku në krahasim me vitin e kaluar është përgjysmuar.
“Në momentin që ne flasim janë 4464 qendra votimi që funksionojnë normalisht me pajisjet elektronike të identifikimit. Janë 206 qendra votimi të cilat sipas informacionit që marrim përmes sistemit, pajisja është e konfiguruar por nuk mund të marrim automatikisht informacion prej tyre. Ndërkohë janë 533 qendra votimi për të cilat ne nuk kemi informacione që do të thotë që pajisja nuk funskionon ose funskionon pjesërisht por nuk kemi këtë të dhënë përmes sistemit. Janë 532 tani se informacioni updateohet në kohë reale, për të cilat supozohet në rastin më të keq që identifikimi të mos bëhet përmes pajisjes elektronike. E kuptojmë shumë mirë rëndësinë e kësaj problematike por kjo është situate, jemi përpjekur të korrigjojmë aq sa ka qenë e mundur të ndryshojmë situatën por kjo është situate e gjithsecili jep interpretimin e vet. Edhe kodi zgjedhur dhe aktet rregullatore kanë parashikuar situate të tilla, që kur implementohet një pajisje elektronike do të duhet të pritët një farë kohe me propabilitetin që të rregullohet. Në vlerësim të situatës dhe problematikave kemi vlerësuar bashkë me komisionerët për të mos penguar procesin e votimit, urdhëruam që ky proces të bëhet me mënyrën tradicionale pasi në aspektin Teknik nuk kishim asnjë mundësi më shumë që të prisnim. Në lidhje me natyrën e problemeve është shume herët për të thënë se cilat ishin arsyet.”– tha Celibashi.
