Ndërkohë që kryebashkiaku i zgjedhur i Himarës, Fredi Beleri ndodhet në qelitë e paraburgimit në Vlorë dhe dosja hetimore ndaj tij i ka kaluar për kompetencë Prokurorisë Speciale, Greqia këmbëngulë për lirimin e tij.
Në kuadër të angazhimeve të shumta që autoritetet greke kanë bërë ditët e fundit që pas arrestimit të Belerit nën akuzën e blerjes së votave, në Vlorë shkoi këtë të enjte Sekretar i Përgjithshëm i Ministrisë së Jashtme të Greqisë, Theoharis Lalakos.
Ai nuk preferoi të bënte ndonjë koment pas qëndrimit përreth 15 minuta me Belerin. Beleri është vizituar më herët edhe nga zyrtarë të tjerë grekë përfshirë ambasadoren e Greqisë në Tiranë, Konstantina Kamitsi, e angazhuar intensivisht që prej arrestimit të Belerit një ditë para zhvillimit të zgjedhjeve.
Krahas angazhimit të drejtpërdrejt, Athina zyrtare ka qenë e ashpër edhe në deklaratat e saj publike duke i kujtuar Shqipërisë se procesi i integrimit kalon përmes respektimit të minoritetit grek në Shqipëri. Ndërkaq, mbrëmjen e së mërkurës, kryediplomati grek, Nikos Dendias ishte i qartë në kërkesën e tij, duke kërkuar lirimin e menjëhershëm të Belerit.
“Duam miqësi, por jo me çdo çmim”, theksoi midis të tjerash ai në tv grek Star.
Gjithashtu, Nikos Dendias bëri të ditur se të hënën do të shkojë në Bruksel për të marrë pjesë në Këshillin e Ministrave të Jashtëm të BE-së, ku do të ngrejë çështjen e ndalimit të kryebashkiakut të Himarës. Gjithashtu ai do të marrë pjesë edhe në një drekë me ministrat e jashtëm të Ballkanit Perëndimor.
“Meqenëse çështja është jashtëzakonisht e rëndë, të hënën në mëngjes do të jem në Bruksel. Aty kemi një drekë me ministrat e jashtëm të Ballkanit Perëndimor Çështja duhet të ngrihet në Këshillin e Ministrave. Nuk është e mundur të mos vendoset. Nuk është e zakonshme ndalimi i një kandidati për kryetar bashkie 48 orë para zgjedhjeve dhe mbajtja e tij në paraburgim derisa ai zgjidhet. Pse mbahet ai? Cili është ky element i rrezikshmërisë së tij që kërkon ndalim të zgjatur? Këto janë pyetje të mëdha”, theksoi ai. Beleri u arrestua për blerjen e 8 votave, ndërsa Gjykata e Vlorës e la atë prapa hekurave.
