Teksa shkonte për herë të parë si Kryeministër në Lazarat 9 vite pas operacionit antikanabis, Edi Rama nuk e kurseu një batutë me ata banorë që ishin brenda qendrës së krijuar për përpunimin e bimëve medicinale. Duke diskutuar për rikonstruksionin e shkollës së fshatit, Rama premtoi financim nëse Bashkia Gjirokastër i dërgonte projektin gati. E në këtë moment për t’i lënë sfidën komplet kryetarit të bashkisë, Rama iu sugjeroi banorëve të merrnin peng Flamur Golemin derisa ai t’u bënte projektin e rikonstruksionit të shkollës
“Jo të tëra zakonet e vjetra duhen harruar, merreni peng këtu…”, tha Rama duke evokuar në këtë mënyrë ngjarjet e vitit 1997, por edhe më pas kur Lazarati ishte një zonë e nxehtë për shkak të kultivimit të drogës dhe rezistencës që i bëhej Policisë së Shtetit për vite e vite me radhë.
Në përfundim të takimit Rama premtoi rikonstruksion të shkollës, ndërtimin e një ure mbi lumin Drino që krijon akses në tokat e Lazaratit dhe mbështetje me AZHBR për vijimin e qendrës së bimëve medicinale. Në videon më poshtë batuta e plotë e Ramës. ©argjiroja.net
