Edmond Dalipi është trajneri i ri i Luftëtarit. Marrëveshja është arritur dhe për sezonin 2023-2024, do të jetë ai në krye të stolit. Objektivi kryesor mbetet ngjitja në Kategorinë e Parë. Zyrtarizimi i tij është bërë një ditë më parë teksa ka nisur edhe stërvitja për sezonin e ri futbollistik. Kampionati do të fillojë ndërkohë më datë 23 shtator.
“Nisim për Luftëtarin sezonin e ri sportiv tashmë nën drejtimin e Edmond Dalipit. Besimplotë për ndeshje cilësore dhe me ambicien për ta rikthyer skuadrën bluzi në elitën e futbollit shqiptar.Po mbështesim financiarisht me investime, infrastrukturën e duhur jo vetëm futbollin por edhe zhvillimin e sporteve të tjera dhe aq më tepër përfshirjen e të rinjve në ekipet sportive. Suksese!”, shkruan kryetari i bashkisë, Flamur Golemi teksa publikon edhe një foto me trajnerin e ri.
Edmond Dalipi ka pasur një karrierë të gjatë si futbollist. Ai ka luajtur me Dinamon, Tiranën, Partizanin, Vllazninë, Bylisin, Lushnjën e Laçin. Po kështu ka pasur eksperienca edhe në Greqi me Apollon Smyrnis dhe skuadrën e Trikalas. ©argjiroja.net
